Mos proposam de hèr un atles de distribucion d'espècies dera Val d'Aran e auem decidit començar per un des grops mès senzilhs: es anfibis. Entà amiar-lo a tèrme auem de besonh era màger quantitat de cites d'aguestes espècies en territòri e ei per açò que mos ei de grana ajuda era tua collaboracion.

Qué ei un atles de distribucion?

Ei ua airina visuau e scientifica que mòstre com se distribusissen es diuèrses espècies en ua region geografica concrèta. Aguest atles conten mapes detalhats acompanhats d'informacion importanta de cada espècia. 

En qué consistís eth projècte?

Cercam volontaris que mos ajuden a:

1. Observar e registrar avistaments d'anfibis en quinsevolh situacion: gargolhes, grapauds, tritons o salimanes.

2. En moment deth avistament préner fotografies d'aguesti e compartir-les en ua aplicacion fòrça simpla (iNaturalist). 

   • Aguestes observacions se pòden realizar en quinsevolh situacion en tot hèr ua passejada, pendent ua jornada de pesca, en tot dar-mos un banh en arriu... çò que facilite fòrça eth projècte.

Se quauquarrés vò realizar un seguiment mès rigorós entà trobar aguesti animaus recomanam realizà'c de net e apròp d'un cors fluviau, donques qu'aguesti animaus son estretament restacadi damb era aigua e sòlen gésser d'era e èster mès vistosi quan era temperatura ambientau ronde entre es 15-20 grads.

Perqué ei important?

Es anfibis son bioindicadors der estat des ecosistèmes. Fòrça espècies son menaçades a causa dera pèrta d'abitat, eth cambi climatic e malauties emergentes, factors qu'afècten ara sua distribucion e abundància poblacionau. Era tua participacion mos ajudarà a:

• Monitorejar es poblacions d'anfibis dera Val d'Aran. 

• Detectar cambis ena sua distribucion.

• Identificar airaus de conservacion.

Era tua participacion compde!

Cada observacion ei valuosa e mos apròpe un pas mès a compréner milhor e protegir aguesti fascinanti animaus. Non impòrte se hès un avistament o cents, cada donada impòrte!

Com identificar-les?

Era pròpria aplicacion iNaturalist propòse ua sèrie d'espècies un còp se compartís era fotografia que nosati verificaram a posteriori. De un aute costat, auem elaborat ua "guida" pròpria dera Val d'aran damb es sies espècies que podem trobar enes sues tres formes vitaus (pòsta de ueus, larva e adult) entà poder diferenciar-les. Ath delà auem ahijut tanben es audios des diuèrsi cants, donques qu'escotar-les tanben compde coma cita.

Descarga-te era Guida d'anfibis dera Val d'Aran, eth Manuau d'instruccions d' iNaturalist e es audios des cants. 

Anfibis Val d'Aran 

As qüestions?

Èm aciu entà ajudar-te. Auem creat un grop de whatsapp especific deth projècte entà resòlver possibles dobtes, se te vòs júnher mana un corrèu electronic a aranperanatura@gmail.com en tot sollicità'c.